Rússarnir komu...

Það hefur varla farið fram hjá neinum að rúsneskar sprengjuflugvélar hafa látið sjá sig í íslenskri lofthelgi í fyrsta sinn í 15 ár.

Pútín hefur verið að gera sig breiðan á leikvelli alþjóðastjórnmálana síðustu mánuði. Enginn veit hvað honum gengur til með þessu. Rússar eru miklir þjóðernishyggjumenn og e.t.v er hann fyrst og fremst að reyna að auka á vinsældir sínar innanlands (sé það rétt er honum að takast ágætlega til við ætlunarverk sitt). Kannski hyggst hann nota vinsældir sínar til að sitja lengur á forsetastóli en stjórnarskrá Rússlands leyfir í dag. Kannski er hann að undirbúa það að halda völdum bakvið tjöldin.

Vonandi er hann ekki að reyna að reka stórveldisstefnu á borð við þá sem gömlu Sovétríkin ráku. Það kann aldrei góðri lukku að stýra þegar ríki reyna að reka stórveldisstefnu af vanefnum. Sumir stjórnmálaskýrendur telja hann vera að reyna að afla takmarkaðrar viðurkenningar frá Washington, þ.e að Rússland verði viðurkennt sem jafningi Bandaríkjanna í málum sem tengjast kjarnavopnum og að það veði tekið tillit til þeirra hagsmuna varðandi allt sem tengist þeim t.d þróun eldflaugavarna og nýrra kjarnavopna. Markmiðið væri þá að viðhalda núverandi ógnarjafnvægi.

Við Íslendingar ættum ekki að þurfa að túlka heimsókn rússnesku sprengjuflugvélanna sem skilaboð til okkar. Rússar voru með fjórtán vélar á lofti og aðeins tvær komu hingað. Það hefur líka þurft að bægja rússneskum sprengjuvélum frá Guam. Þessi heimsókn ætti þó að vera okkur áminning um það að við erum á milli Rússlands og Bandaríkjanna og það þarf ekki mikið ímyndunarafl til þess að sjá fyrir sér allskyns kringumstæður þar sem við lendum á milli einhverra, t.d gætum við lent á milli hryðjuverkamanna og bandarískra sendiráðsstarfsmanna ef við slökum á verðinum. Það eru engar tryggingar fyrir því að við verðum látin í friði ef við látum af öllu "hernaðarbrölti".

Að lokum get ég ekki látið það vera að hnýta aðeins í "hernaðarandstæðinga". Ég kíkti inn á vefinn fridur.is til þess að sjá hvort þar væri að finna einhver viðbrögð við heimsókn sprengjuvélanna. Þegar þetta er skrifað ( 18/8 kl 00:49) hafa engin mótmæli verið boðuð við rússneska sendiráðið. Athyglisvert er að á vefnum fer mest fyrir tvennum átökum og einum möguleika á átökum. Þar eru sérstakir efnisflokkar fyrir mál tengd Írak, Líbanon og Íran. Ég gramsaði í gegn um hluta af síðunni (ekki tæmandi leit) og fann umfjöllun um Hiroshima og Nagasaki. Ég fann nær ekkert um málefni Téténíu (Alcan mun framleiða ál sem notað er í vopn stríðsaðila) og hvergi sá ég minnst á t.d málefni Sómalíu, Nepal, eða Súdan. Ekki er hernaði Hamas-samtakana mótmælt þar. Ég er alls ekki svo viss um að andstaða þeirra sé í raun við hernað.   

   

Athugasemdir

[Hans Haraldsson, 18.8.2007 kl. 15:06]

M.ö.o: þeir eru fáfróðir og hafa litla yfirsýn?

[Hans Haraldsson, 18.8.2007 kl. 15:48]

að var nú reyndar spurningamerki þarna aftast.

Samkvæmt minni kortabók eru Ísrael og Líbanon nokkuð langt frá Íslandi.

[Hólmgeir Guðmundsson, 18.8.2007 kl. 17:04]

Nú hafa herandstæðingar brugðist við lögeggjaninni hér að ofan og sett mótmæli á vef sinn. Til allrar hamingju gátu þeri fundið út að viðbrögð vestrænna þjóða við flugi Rússa væru í raun aðalháskinn.

Að sjálfsögðu eru hernaðarandstæðingar í andstöðu við hernað, hins vegar virðist þeim þykja sumar birtingarmyndir hans viðurstyggilegri en aðrar. Þannig fann ég á vef þeirra frétt um mótmæli við stríðsglæpum á Gaza, þar var mótmælt verkum Ísralesmanna. Útrýmingarherferð Hamas gegn Fatah-liðum virðist þeim ekki þykja verð sinnar athygli. En það er nú bara svona, þetta eru jú einu sinni samtök sem að stofni til eru málsvari verkalýðshreyfingar, þjóðfrelsisbaráttu og Marxisma.

Annars fann ég á vef þeirra fróðlegar greinar eftir Vigfús Geirdal, og einnig greinar eftir Elías Davíðsson sem einnig mætti kalla fróðlegar, þó ekki um það efni sem þær fjölluðu um.

[Hans Haraldsson, 18.8.2007 kl. 17:12]

Ég setti þessa athugasemd inn á annað blogg en hún á ágætlega heima hérna líka:  

Þessi tilkynning "hernaðarandstæðinga" er 188 orð. Þar kemur orðið "Rússland" einu sinni fyrir og tvisvar talað um eitthvað rússneskt. Orðin "Bandaríkin" og "Bandaríkjastjórn" koma hvort um sig einu sinni fyrir, einu sinni er talað um eitthvað bandarískt og einu sinn er talað um NATO.

Í dæminu sem er tekið (njósnaflugvélarslysið) áttu Bandaríkjamenn í hlut. Rússar eru fordæmdir fyrir að virða ekki afvopnunarsáttmála en um leið tekið fram að Bandaríkin séu ekkert skárri (reyndar eru þau nefnd fyrr í setningunni). NATO er fordæmt fyrir uppvöðslusemi og yfirlýsingunni lýkur með fordæmingu á yfirstandandi varnaræfingu sem tengist málinu alls ekki neitt nema að menn samþyki þá vafasömu og órökstuddu fullyrðingu að varnir auki á líkurnar á uppvöðslusemi Rússa.

[Hans Haraldsson, 18.8.2007 kl. 18:18]

Ég man ekki eftir að hafa kallað þig "friðarsinna". Sagði einhvern tímann að þú værir vopnlensisinni en samkvæmt minni skilgreiningu eru það þeir sem skrif upp á þá kenningu að vopnaburður þjóða skapi í sjálfu sér, eða geti skapað hættu án þess að margt fleira komi til.

Skil hvað þú meinar með liðin. Á sjálfur ekki eitt einasta flokks- eða félagskýrteini (ákveðnar póstsendingar hafa reyndar vakið hjá mér grun um að ég sé félagi í Framsóknarflokknum en ef svo er veit ég ekki hvernig það gerðist).